WAIMAPU MARAE

WAIMAPU MARAE

Tērā ētahi maunga e whā, i tū ki waenga i ngā puke, i ngā kōawaawa i ngā paenga o te wao o Hautere. Arā a Pononga (he mōkai, hāwini rānei) me tētahi maunga rangatira; he taumata i kākahutia hei tohu whenua ki ngā iwi o Tauranga Moana. Ki te uru-mā-tonga te āhua hangareka o tētahi maunga rerehua; he wahine i kākahutia ki ngā tini aruhe, kōkōmuka, rākau hoki a Tāne. Ki te rāwhiti, tū ai tētahi maunga mokemoke tuawhā e whātaretare ana ki te ngahere, ki tua o Pononga. I kōingoingo tēnei maunga mokemoke kia kite atu ai i te maunga āhua reka, engari nā te aukatinga o tana titiro atu, ka tipu te pūhaehae, nāwai rā ka mōhiotia tēnei maunga, ko Harawene.
I mate kanehe a Pononga ki te maunga ataahua. Engari, kua riro kē tōna ngākau i te maunga ātaahua
rangatira, nā i auraki atu te wai ki a ia kia matomato te tipu o ōna kākahu rākau rā. Nā, ka mōhiotia tēnei maunga rangatira ko Ōtānewainuku. Nā aua wai rere tonu i puea mai te ingoa o te maunga ātaahua rā: nā, ka mōhitotia ia ko Pūwhenua.
Kāore he putanga ki te maunga mōkai nei, kāore ōna mana ki te whakawai i a Pūwhenua hei wahine māna. Nā tōna pouri, rāwakiwaki hoki, i whakatau ia ki te whakatoromi i a ia anō ki roto i te Moananui-a-Kiwa. Ka karanga ia ki ngā patupaiarehe, he iwi tipua i noho ki te wao o Hautere. He hoa rātou ki a ia, ā, nā tā rātou tūmatarau i tāmakatia ai ētahi taura nui, hei tō atu i a Pononga mai i te tuawhenua ki te moana. I a rātou e kume ake ana i ngā taura, ka tākina tā rātou karakia:

E hika tū ake
Ki runga rā whītiki taua
Hei tama tū
Uea ki te uru
Kumea ki te tonga
Hiki nuku Hiki rangi i arā rā
Ka ngaru e, ka ngaru e
Tōia ki te hau marangai
Kia whakarongo taku kiri
Te kikini a te rehutai