HAIRINI MARAE
TE WHAKAPAUKARAKIA
HAIRINI MARAE
He uri a Tamahika i a Ngāraranui o Te Arawa. Ka moe ia i a Ngāriunga o Ngāti Ranginui. Tokowhā ā rāua tama, tokorua ā rāua tamāhine: ko Te Kiriwera rātou ko Rauika, ko Waunga, ko Ngārongo, ko Tāhora, ko Kahumouku. Ka heke ngā whānau Ngāi Te Ahi katoa i ēnei tūpuna.
Ka pakeke ana a Ngāriunga ka mea atu ki a Tamahika, “Heria ahau ki te kāinga, tūtaki ai i ōku iwi i Tauranga.” Ka whakaae atu a Tamahika, ka āpiti atu tokorua o āna tama mātamua hei haumi, ka whakatika rātou ki te haere. Ka rongo te teina o Tamahika, a Korokaha mō āna whakaritenga, ka mea atu, “Haere hei kai mā Ngāi Te Rangi, kua para koe i te ara, māku e whai.”
Ka whai te tira haere i te ara hīkoi mā te kōawa o Mangorewa kia tae rā anō ki Whakapaukarakia, ki Ōropi, ka noho mō te pō. I kōnei, ka mea atu a Tāriki, taokete o Tamahika, “E Tama, e hoki ki Rotorua kei patua koe.” Ka whakahoki a Tamahika, “Kia ahatia! Tini whetū ki te rangi, ko Whakaue ki te whenua.”