PAPAROA MARAE

PAPAROA MARAE

I nehe, he whēuaua te āhua oranga ki Wīwī. i te rautau tekau mā-whitu, he urutā huhua, he iti hoki te kai. I raro
i te Kīngi, i raru nui te iwi tuakoka, ka mutu, ko te painga atu mēnā he taurekareka kē. I te nuinga o te wā, ka haurua te huanga kai hei utu tāke, me te aha, he iti te kai hei tautīnei i a rātou anō. I runga i ngā kaipuke, he kino kē atu te nohonga. Ka māuiui nuitia te iwi ka haere mā runga kaipuke, i te kore kai me te kore painga; nā te kiriwera, i te paunga o ngā kai, ka kai kē rātou i te kiore, i te parureka me te kirikau pūtu i kōhuatia hei kai. Ko te wā tērā i ora ai a Emile Borel. I whānau mai ia i tētahi ata mākinakina i te 8 karaka, te tuawhā o Hune i te tau 1814, i Touques i te Ākau Wīwī. He tama ia nā Francois Borel rāua ko Marguerite Lemone.
I te marama o Hūrae, 1841 ka wehe a Emile i Wīwī ki Ahitereiria mā runga te kaipuke patu-wēra Wīwī a Roland. Ehara ia i te kaumoana engari ka waihanga ia i ngā kāho ka pupuri i te hinu wēra. I waenga i te moana, ka rokohina atu e Emile mā tētahi kaipuke kua tahuna, arā, ko te India. Ko Emile tērā, ko rātou katoa tonu i tahuri ki te huti ake i ngā mōrehu i te wai. Ahakoa te tata hemonga o ngā mōrehu, ka manaakitia rawatia e Emile mā kia tae rā anō rātou ki Rio de Janeiro i te 24 o Hūrae.