PETEREHEMA MARAE
TE RERE I ŌTURU
PETEREHEMA MARAE
Rere ia nei te awa o Ōpuiaki mai i te whenua ngāherehere, pukepuke hoki o Hautere, ka riringi ki te Rere i Ōturu, he whenua nō te Kaporeihana Ōmanawa. Ka rere te Ōpuiaki ki Mangapapa, ki te awa o Wairoa, tatū atu ki Tauranga Moana. I Ruahīhī, i te hīwi e tapatapa ana ki Wairoa, tū ai tētahi kāinga, i reira a Ōturu me tāna pā harakeke e noho ana. I whānau mai ia i reira, ā, e hia kē nei āna hīkoitanga ki te awa ki te tāhei manu, ki te hīnaki tuna hoki. I ētahi wā, ko ia anake ka haere mō tētahi wā. Ka hoki atu ia, he ruarua manu, he tuna whīrokiroki noa kei ōna ringa. Haere anō ai a Ōturu, ka roa hoki ia e noho atu ana. Ia te hokinga atu he iti te kai ki te whāngai i tāna whānau, ka mutu ka māuiui haere rātou. Ka tūpuhi tōna hoa rangatira me āna tamariki, ka māuiui i te korekore o te kai tika, engari a Ōturu e ora mutu ana. He aha hoki tēnei hanga; i mōhio te katoa ki te mōmona o ngā kererū i ngā ngāhere
o Hautere, me te mōmona anō o ngā tuna i ngā manga o runga o Ruahīhī. Tokorua ngā tungāne o te hoa wahine o Ōturu i māharahara ki a Ōturu e tūkino ana i tāna whānau i te kore i whāngai tika i a rātou, ahakoa te pai o tōna hanga. I mahara ngā tūngane ki te whai i a Ōturu i te haerenga e kainamu ana, ki roto i te ngahere ki te kite i āna mahi ki reira.