POUTŪTERANGI MARAE
TAKURUA
POUTŪTERANGI MARAE
He pā a Raropua ki Te Puna, i te pito o te rori o Tangitū. Ko te pā tēnei o Tūtereinga, tama a Ranginui.
Ka noho a Takurua ki tēnei pā. He tangata kaitā; pakaua, māia hoki. He tangata huruhuru hoki; nā konei tōna kaha pea. I rongonui ia hei toa kairākau o Raropua.
I tētahi rā, ka whakaeke mai te tauā ki Raropua. Ahakoa te māia o Takurua me āna toa, ka horo te pā i te hoariri, ka whakarērea e Takurua me āna toa. Mokori noa, he tai timu i taea ai e Takurua te oma mā te tāhuna o Waikaraka. Heoi anō rā, i kitea, i whāia wawetia e tētahi peka tokotoru o te tauā. I tērā atu taha o te tāhuna, i kitea e Takurua tētahi waka kua pae ki uta. Nā te ohorere, i makere i a ia āna rākau ki Raropua. Ākene pea, he hoe mata arero hei rākau māna ki te patu i te tokotoru i te whai i a ia.