Pūrākau : PŪWHENUA

Ka noho te rangatira nei, a Rongokako rāua ko tana tamaiti a Tamatea ki Kaitiritiri, ki tua o te Moananui ā-Kiwa. I tētahi rangi, i whakatau a Rongokako rāua ko Tamatea Arikinui ki te waihanga i tētahi waka, whakatere atu ai mai i tō rāua kāinga i Te Moananui ā-Kiwa ki Kohurangi, ki Aotearoa – te whenua i kitea ai e Kupe.

Ka karanga a Rongokako ki tāna iwi, ka tohutohungia rātou ki te kimi i tētahi rākau nui, hei waihanga mai i te waka, hei toro i te nukuroa. Hāhā uri, hāhā tea te haere a te iwi, auare ake te kitea o tētahi rākau e hāngai ana.

I taua wā tonu, ka rongo a Waitaha mō ngā whakaritenga a Rongokako rāua ko Tamatea Arikinui, ki te waihanga i tētahi waka; ka pātai atu ia kia tae atu rāua ki a ia i tō rāua nā wā.

Ara anō tētahi, ko Hei tōna ingoa. Ko Waitaha tāna tamaiti. Ko Ruarangi tāna tamaiti. Kua moe ia i a Te Moana i-Kauia. Tokorua ā rāua tamāhine, ko Ihuparapara rāua ko Iwipupu.

Nō te taenga atu a Tamatea Arikinui ki tō Waitaha kāinga, ka kī atu a Waitaha ki a Tamatea Arikinui ki te haere ki Pūwhenua; ki reira kitea ai tētahi rākau ki te waihanga i te waka hei kawe ake i a rātou ki Aotearoa.

Nā te aroha ki āna mokopuna, i whakaaro ai a Waitaha ki te koha i tēnei rākau ki a Ihuparapara rāua ko Iwipupu, nāwai rā ka moe rāua i a Tamatea Arikinui.
Mea ake, ka tīkina te rākau. Ka keria mai i ōna pakiaka kia kore ai e whati, kātahi ka porohia mai i te aka ki te kāuru.

Ko ngā ingoa o ngā tohunga poro i te rākau Pūwhenua me te tārai i te waka, ko:

Ko Ruawharo = Huiterangiora
Ko Tupai = Wharaurangi
Ko Taikehu =Tenakura-Kautawhaki Ko Pawa = Te Kaukau
Ko Kahupara = Matangireia

Nō te waihanganga o te waka, ka tapaina ko Tākitimu; ka kumea atu te waka ki tētahi wāhi, ko Pikopiko-i-whiti. I te taenga atu o ngā kaumoana, i pōhiritia ngā tohunga, a Ruawharo rāua ko Tupai ki te taki i ngā kawa tapu e tau ai te āwhā me ngā huarere kikino, kia huri ai te ihu o te waka ki te au moana me te huaki i te whakaterenga ki Aotearoa.

Ka tae te wā kia eke atu ngā kaumoana ki runga. Ka whakatū rātou i te maihi, i ngā papa puoto me ngā hoe ki runga i te waka; ka āpitihia ngā rauawaawa, ā, ka ngahua te ihu.

Koinei ngā ingoa o ngā hoe tapu i hoe i a Tākitimu;

Ko Rapanga-i-te-ata-ā-Rangi
Ko Rapanga-i-te-ata-ā-Nuku
Ko Manini-Kura
Ko Manini-Aro
Ko Tangi-te-Wiwini Ko Tangi-te-Wawana

I mua i te hoenga atu ka karangahia e rātou ngā atua ki te huihui; ko Kahukura rātou ko Hinekōrako, ko Hinehuruhuru, ko Tamaiwaho, ko Tūnui-te-Ika, ko Rongomai, ko Ruamano: kātahi ngā tāne, ngā wāhine me ngā tamariki ka eke ki runga.
Ka tātaingia ngā toki tapu, a Te Awhiorangi me Te Whironui. Nā ēnei toki tapu, a Tamatea Arikinui i wāhi ngā ngaru o te Moana Nui-ā-Kiwa.

Ka eke te waka i nga ngaru moana kia tae rā anō ki Kaitaia, noho ai mō tētahi wā; ka tere tonu atu ngā kaumoana ki Tauranga. Nō te taenga atu, ka kake a Tamatea Arikinui me tāna iwi i a Maunganui. Ka mātiro atu a Tamatea Arikinui ki Ōropi, ki te wao nui o Hautere, ka tapa ia i te maunga i kitea i reira, ko Pūwhenua. He mea whakamaumahara ki a Waitaha i noho atu ki Hawaiki. He mea whakamānawa mārire i a Waitaha; i te mea, nāna te rākau i tūā ko Pūwhenua – te rākau i hangaia mai ai te waka nui o Tākitimu.

HE KARAKIA TĀNGA TĒNEI O TE WAKA

(Tahi)
Tēnei au haere mai te akaakanui
Tēnei au haere mai te akaakaroa
Tēnei au haere mai te akaakana i to matua
Take take te waiora
Ki tēnei tama nau e io tikitiki orangi

(Rua)
Tēnei haere mai te akaaka matua
Ki ēnei tama tipua
He tama tāwhito
He tama Atua
He tama nau e io Akaaka

(Toru)
Tēnei au te hapai ake nei i aku toki
Ko wai aku toki
Ko Huiterangiora
Ko wai aku toki
Ko Wharaurangi aku toki
Ko wai aku toki
Ko te Iwi Arona aku toki
Ko wai aku toki

(Wha)
Ko te Kau-kau aku toki
Nā wai aku toki
Nā Tawaki aku toki
Nā wai aku toki
Nā rātou aku toki
Nā wai aku toki
Nā Rata i te Pukekenga
Nā Rata i te Wānanga
He toki tīpua
He toki tāwhito

(Rima)
Hapai ake nei au i aku to
He toki aha aku toki
He toki topetope i te Waonui a Tāne
He toki whakahekenga ki raro
He toki tīpua
He toki aronui
He aha aku toki
He toki tēnei i toku waka i a Pūwhenua

(Ono)
He waka aha taku waka
Ke waka tapu taku waka
He waka aha taku waka
He waka atua taku waka
He waka aha taku waka
He waka wawahi i te tua hiwi o Hinenui Moana

(Whitu)
Ko wai taku waka
Ko Tākitimu taku waka
He waka aha taku waka
He waka tangata
He waka Ariki
Hei waka ki Aotearoa
Ki te take whenua ai