WAIROA MARAE

WAIROA MARAE

Kotahi rau mita i te tahawai mai i te piriti e whakawhiti ana i te awa o Wairoa, he rua hōhonu ki te tahataha, ki Tauranga. Ko te kāinga tēnei o Te Pura, ā, ko te ingoa o te rori ki reira ināianei ko Taniwha Place. Ko Te Pura te ingoa ake o te marae o Wairoa, kei runga i te hiwi mai i te piriti.
I mōhio te iwi o Wairoa ki te taniwha i te awa, ā, kāore rātou i whakapōrearea i a ia. Heoi anō, i tētahi rā, i te hōhā haere ngā tamatoa i taua kāinga, ka whanake rātou ki te nanakia haere. Ka heke tētahi wāhanga o rātou ki te kāinga o te taniwha. Ka tatari kia puta te taniwha i te rua, kātahi ka ruku rātou ki te wai, ki te kōhanga rā anō o te rua taniwha, nā, ka kahakina ngā hua. Ka whaohia ki rō kete, ka whakahokia ki te pā.
I taua pō, ka hoki te taniwha ki te kāinga, ka kitea kua murua tōna kōhanga. Ka eke ki runga me tana mōhio tūmatarau ki ngā mahi whanoke rā. Ka kake atu i te hiwi ki te pā mā te whai i te kakara o aua tamatoa whānako rā. Ka rokohina te wharepuni, i reira rātou e moe ana engari kāore i whakaoho i te iwi i roto rā. Ka kūpapa atu kē ki te tirotiro haere. I te iri te kete mau hua rā i ngā heke o te whare.

Ka matika te taniwha, ka toro ki te nanao atu i te kete me te huri ki te kūaha. Heoi anō, nā tōna rahi ka tukia te kūaha, ka taka iho mai te pare. Ka oho te iwi me te mātiro atu i te hiku o te taniwha rā e rehurehu haere ana i te ara. Ka opeti te iwi rā i te mataku, tē aro i a rātou ki te utu i te whānakotanga o ngā hua. Ka mū te whare.

Nāwai rā, ka tūwhitia te hopo me te tirotiro haere a te iwi ki waho o te wharepuni. I reira, kitea ai te taniwha i te whitinga o Māhina, e heke atu ana ia ki te awa. Ka whāia ki tawhiti, ka kitea ai te taniwha e ruku atu ana ki tōna rua, ki te taha o te wai.
Kāore i tua atu i taua pō, engari i te ata ka rere ngā pakirehua. He aha i taka ai te pare i te kūaha? I mate ngā nanakia rā ki te whāki i ā rātou hara, te whānakotanga o ngā hua, ka mutu, ka kōhete kinotia rātou e ō rātou pakeke.